一、3145基本資料一覽
華夏亞洲高息股票ETF（3145）的目標係年化息率8厘，屬於市場上少數每月派息的ETF產品之一。香港市場的每月派息ETF產品選擇唔多，除咗一啲Covered Call之外，主要就只有3466、3145同埋近期推出嘅3031。
| 股票訊息 | 華夏亞洲高息股 | 恒生高息股30指數 |
| 香港股票代號 | HKG:3145 | HKG:3466 |
| 全年經常性開支比率 | 0.80% | 0.70% |
| 管理費(每年) | 0.60% | 0.55% |
| 推出日期 | 2014年11月13日 (自 2025 年 10 月改變) | 2025年4月7日 |
| 規模/發行數量(截止2026年7月10日) | 11.44億 /8,240萬 | 128.37億/6.75億 |
值得留意嘅係，3145近期有費用結構上嘅調整。由2026年6月22日起，信託人費用由每個子基金每年0.07%降至0.04%。不過目前全年經常性開支比率仍然喺0.8%左右，比起3466依然係貴少少。
二、重要背景：指數曾經轉換基金經理及標
呢一點係分析3145嗰陣最容易被忽略嘅關鍵。3145喺2025年10月31日之前，追蹤嘅係納斯達克亞洲高息股票指數；但由2025年10月31日之後，轉咗做彭博亞太高息股40正回報指數。
呢個轉變代表咩呢？代表選股邏輯已經完全唔同晒。如果大家仲用2025年10月31日之前嘅數據去推算3145嘅表現或者股息，其實係完全唔準確嘅。以前嘅派息係每季派一次，但轉咗指數之後先至變成每月派息。
三、資產規模增長
截至2026年7月9日，3145嘅資產規模大約係11.44億。對比返2025年11月末嘅1.8億，其實已經翻咗好幾倍，反映市場資金持續流入。暫時不會有退市風險(等值1億港元以下)，雖然3145與3466有明顯規模差距，但相對於品牌﹑推廣都有著相關性影響，而持倉更是不同性質，無法完全比較。
四、3145 vs 3466 基本比較
| 股票訊息 | 華夏亞洲高息股 | 恒生高息股30指數 |
| 每股手數 | 200 | 400 |
| 股價(26年7月10日) | 14.06 | 19.06 |
| 入場價 | 2,812.00 | 7,624.00 |
| 派息政策/頻率 | 每月(自 2025 年 11 月起生效, 近期$0.1) | 每月 (近期$0.11) |
| 每手派息 | $20.00 | $40.00 |
| 假設同樣股數比較 | $5,624.00 | $7,624.00 |
| 400股 收息 | $40.00 | $44.00 |
| 近一期年化息率(以7月10日股價計) | 7.11% | 5.77% |
入場門檻： 3145嘅股價大約14.06元，每手200股，入場費大約2,800幾蚊；3466每手400股，入場費相對高啲。對月供或者小資族嚟講，3145會比較吸引。
派息日期： 3145每個月嘅派息日係以第三個星期三作為基準，遇到假期就會延後。呢個安排相對穩定，容易預期。
當前派息率： 3145目前嘅年化派息率大約7.11%，未達目標年息8%；3466喺減息環境下大約5.77%，亦暫時未到目標年息率7%。
五、選股邏輯大公開——呢個係最核心嘅分別！
| 華夏亞洲高息股 | 恒生高息股30指數 | |
| 相關指數/回報類型 | 彭博亞太高股息40淨回報指數 | 恒生高息股 30指數 |
| 成份股/持倉 | 指數中篩選40隻兼具優異盈利能力和穩健財務狀況的上市公司; 亞洲高收益股票 (亞太地區，排除上海/深圳交易所上市證券) | 集中於香港上市證券 （包括 H 股、紅籌股及 P 股） 30隻 |
| 選股邏輯 | (1) 市場數據篩選 （要求公司至少擁有 7.5 億美元的自由流通市值、90 天平均交易額至少為 1000 萬美元，以及彭 博預計股息收益率（至少由 3 名分析師提供估計）小於或等於 20%）， (2) 品質篩選（要求公司根 據其槓桿率和股本收益率得出的綜合品質排名，位列前 90%）， (3) 多元化篩選（要求公司在彭博 預計股息收益率排名中，在同貨幣、同市場、同行業的公司中排名在 15 位以內）； 及 (4) 基於彭 博預計股息收益率的最終篩選。 | 六個月平均每日成交額 ≥ 2,000 萬港元剔除一年歷史波幅最高的 10% 證券符合以下兩個條件的證券會被剔除 1)過去12個月內價格跌幅超過50% 以及 2) 過去12個月價格表現排名為最低的10% |
| 派息要求 | 彭博綜合預測 (“BEst”) 股息收益率作為核心篩選指標即不參考以往派息表現 | 擁有最近連續三個財政年度的派息紀錄 |
3466嘅選股邏輯： 以歷史數據作為參考。佢哋睇嘅係過去六個月平均成交、過去一年波幅、過去12個月股價跌幅等數據。問題在於，呢種方法只係反映過去嘅表現，而唔係預測未來。所以6月8日3466轉倉嗰陣，剔除咗能源同地產股、換入消費股，就係因為上年消費數據好睇。
3145嘅選股邏輯： 採用咗一個更創新嘅方法。佢唔單止參考過去派息紀錄，而係由最少三個分析師深入評估超過二千隻亞洲股票，預測未來一年嘅派息潛力。具體嚟講，3145嘅選股流程有四層漏斗(詳情請參考官網 – 產品章程)：
- 市場數據篩選： 從超過6,000隻股票入面，揀選流通市值至少7.5億美元、90天平均交易至少1,000萬美元嘅股份
- 品質篩選： 綜合考慮股本回報率（ROE）等指標，排名必須喺前90%
- 多元篩選： 按貨幣、市場同行業分類，每個類別排名15位以內
- 最終篩選： 預計股息率前32名直接入選，第33至48名再重新篩選，直至揀到40隻為止
3145採用彭博綜合嘅預計股息收益率作為核心篩選條件，用嘅係BEst DPS方法——以期間加權平均數混合遠期方法計算，反映至少一至三位分析師對每股股息嘅預期平均值。
簡單講：3466睇過去數據歷史作派息支持，3145除了看歷史數據同時有理據地作為出未來派息預估。
六、地區分佈與防守力實測
3145嘅地區分佈方面，香港佔大約30%，其餘係台灣、泰國、印尼等地。呢個配置喺3月美伊戰爭同6月港股受壓期間，發揮咗一定嘅防守作用——因為70%嘅非港股部位抵消咗30%港股嘅跌幅。
行業分佈方面，金融股（主要係泰國、印尼銀行）佔大約三分一，息率普遍8%以上；資訊科技（包括半導體相關）提供增長潛力；其餘係非必需消費同公用股。整體嚟講大約一半係穩定派息，一半混合增長潛力。Investing Pro 生成持倉表參考按此，Investing Pro 訂閱優惠
七、9月轉倉風險預告
根據產品章程第125頁，3145追蹤嘅新指數每年3月同9月會進行調整。指數變化嘅公佈時間係2月同8月嘅最後一個星期三——換句話講，就係下個月（2026年8月） 就會有新嘅持倉更新公佈。新嘅持倉會喺9月第二個星期三正式生效。
如果近期打算買入3145，就要留意呢個持倉變化所帶來嘅風險。
總結
3145同3466雖然都係每月派息嘅高息股ETF，但兩者嘅選股邏輯有根本性分別：
- 3466以流動性﹑波動性及歷史數據為基礎，反映過去嘅高息表現評估派息
- 3145以多元貨幣﹑市場﹑行業結合其歷史+預測數據為核心，瞄準未來嘅派息潛力
3145嘅優勢在於地區分散（唔係全部港股）、選股邏輯較前瞻（有分析師預測）、入場門檻較低（適合小資族）。但都要留意：目前派息率未達目標8厘、費用比率比3466略高、以及即將喺9月公佈嘅持倉變化所帶來嘅不確定性。
投資高息ETF嘅重點，唔係單純睇佢而家揸住咩股票，而係要問自己：你同唔同意佢嘅選股邏輯？
🔍 投資者注意
免責聲明： 本人並非香港證監會持牌人，本文章所有分享純屬個人意見，絕對不能視為投資意見，亦不構成任何投資產品之要約、要約招攬或建議。另本人無法保證有關內容的真確性和完整性。投資前記得做風險評估或諮詢專業投資顧問。
常見問題
Q1：3145每個月幾時派息？
3145每個月嘅派息日係以第三個星期三為基準，如果遇到公眾假期就會延後至下一個交易日。例如2026年2月因為農曆新年假期，派息日就由第三個星期三延後咗。
Q2：3145嘅目標8厘息係咪保證做到？
唔係保證。8厘只係目標，實際派息會受市場波動影響。截至近期數據，3145嘅年化派息率大約7.11%，未達8厘目標。另外派息金額會跟隨股價同上同落——股價跌嘅月份，派息金額就會少啲。
Q3：3145同3466有咩最大分別？
最大分別在於選股邏輯。3466主要參考過去嘅派息數據；3145則採用前瞻性預測，由分析師估算股票未來嘅派息能力。另外3145嘅投資範圍涵蓋亞洲多個市場，唔局限於港股。
Q4：3145嘅費用比率幾多？
目前全年經常性開支比率大約0.8%左右。雖然信託人費用已經由0.07%降至0.04%，但整體費用仍然比3466略高少少。
Q5：3145幾時會轉倉？
根據產品章程，指數每年3月同9月會進行調整。公佈時間係2月同8月嘅最後一個星期三，即係2026年8月就會有最新嘅持倉變化公佈，新持倉會喺9月第二個星期三生效。
Q6：3145適合咩類型嘅投資者？
3145適合追求每月現金流、願意承受一定市場波動、認同前瞻性選股邏輯嘅投資者。入場門檻較低（每手200股），對月供或者小資族相對友善。不過要留意佢嘅地區分散特性—港股佔30%左右，如果睇好港股反彈，3145嘅受惠程度可能唔及純港股ETF。
參考資料︰
