退休係人生大事，尤其係我哋香港人，個個都擔心「長命百歲但冇錢使」。舊錢究竟擺喺政府年金好，定係買而家好Hit嘅備兌ETF（Covered Call ETF）收息好呢？
今日呢篇文章，我就唔同大家講虛無縹緲嘅理論，直接用香港年金官網嘅真實計算機數據，同大家拆解兩者嘅好壞，仲會模擬Covered Call ETF嘅最差情況，睇吓各產品風險優劣做比較。
| 比較維度 | 香港年金 (政府年金) | 私營年金 (如 QDAP) | 備兌認購期權 (Covered Call) ETF |
| 產品本質 | 保險產品 (即期終身年金) | 保險產品 (延期或即期年金) | 投資工具 (主動型 ETF) |
| 發行機構 | 香港年金有限公司 (具政府背景) | 商業保險公司 | 基金公司 |
| 適用對象 | 60歲以上 | 18歲以上 | 18歲以上 |
| 運作機制 | 一次過繳費，下月起領取長糧至百年歸老 | 可選擇分期 (如5/10年) 或一次供款，累積後滿50歲領取(可按月/季/年) | 持有成分股並沽出認購期權賺取期權金 |
| 回報結構 | 全數保證，金額固定，不設非保證部分 | 保證 + 非保證 (分紅/投資回報) | 不保證，視市況及期權策略而定，可能「賺息蝕價」 |
| 退休保障 | 對抗長壽風險，活得愈長領得愈多 | 兼顧儲蓄與退休，部分產品可按年調整以抗通脹 | 提供高額月度現金流，但需承擔資產波動風險 |
| 流動性 | 極低。資金長期鎖定，提早退保或有重大損失 | 中等。設有保單價值、保費假期或退保選項，彈性相對較多 | 高。交易時段內可隨時在聯交所買賣套現 |
| 稅務安排 | 不設扣稅安排 | 合資格延期年金 (QDAP) 每人每年最高節省$10,200稅款 | 無特定稅務優惠 |
| 遺產傳承 | 設保證期 (105%保費)，若期內身故受益人可領餘額 | 若受保人身故，受益人可獲身故賠償或繼續領取年金(或保證現值) | 剩餘資產按市價由繼承人繼承 |
首先，年金有分兩種：
- 政府年金（香港年金）：即期終身年金，一炮過俾錢，下個月即刻有糧出，直至百年歸老。背景係政府，所以大家叫佢政府年金，入場門檻係60歲，最低5萬蚊。
- 私營年金（QDAP）：坊間保險公司提供，分延期同即期。延期嗰隻18歲已經可以買，但要等到50歲先開始拎得。好處係可以用嚟扣稅，每年最高可以慳到$12,000稅款。
回報與風險結構：
政府年金嘅好處係「保證」派發，而且有個105%嘅保證，即係你擺100萬，最少都有105萬拎得返（當然要符合條件）。而私營年金就有分「保證」同「非保證」，非保證嗰部分有機會分紅，但同樣有機會得個桔(唔一定保證派息率時)。
至於備兌ETF，大家要記住，呢個絕對唔係保險產品，而係投資產品！即係代表價格可升可跌，甚至有可能變到一文不值。基金公司只負責執行策略，你啲錢其實係放喺信託銀行度。
流動性與遺產承傳：
呢個位好重要！政府年金如果你想中途退保，係會俾人打個七折左右，非常蝕底。但如果你係「走咗」而未完約，家人就可以拎返保證嘅餘額（100萬減已拎金額）。
而備兌ETF嘅好處係可以隨時喺市場交易，等錢使嘅時候可以即刻沽貨變現。但壞處就係如果你自己唔夠定力，好容易因為心動而沽走，鎖唔到呢筆退休錢。財富傳承方面，ETF係跟市價，你戶口有幾多，仔女就拎到幾多，清清楚楚。
計計數比較：100萬本金大比併！
我參考咗政府年金官網嘅計算機，假設大家60歲入場，擺100萬：
- 男士：每個月大概拎到 $5,100
- 女士：每個月大概拎到 $4,700（因為統計上女士平均命長啲，所以每月派少啲）
女士比較蝕底，所以我用女士數據同Covered Call比。政府年金你要去到77至78歲（即係第18年），先正式拎得返超過100萬（即係105%保證）。
如果用備兌ETF，假設佢每年派10厘息（中間數，唔係20厘咁進取），就算股價好差，跌到資產淨值得返40%（即係100萬變40萬），我哋計一計：
- 每年收息：$100,000
- 7年後，你總共收咗 $70萬 息，加上剩下嘅 $40萬 資產，總數已經係 $110萬。
- 即係話，就算市況咁差，大約第7年，備兌ETF已經可以做到本加息回本。
如果再極端啲，假設ETF跌到「歸零」（淨係靠派息），你都係大概第11年先完全靠利息Cover返本金(但真係歸零好大獲…會退市了…)。相比之下，政府年金要到第18年先叫「打和」，但都叫保證取回保費金額，風險會但低很多。
📌 總結
睇完上面嘅基本比較及計數，大家可能會覺得備兌ETF係贏?但老Best要同大家講，呢個世界冇免費午餐。
- 備兌ETF：回報潛力高、流動性強，但你必須承受價格波動嘅風險。如果市況唔好，佢嘅派息隨時會減，甚至連本金都蝕埋。
- 政府年金：回報較低、極度唔靈活，但佢有政府擔保，提供一個「對沖長壽風險」嘅作用。你越長命，就拎得越多，適合追求穩陣嘅退休人士。
記住，千萬唔好將所有雞蛋放喺同一個籃入面。如果你後生啲、風險承受能力高，可以考慮用其他增值方式創造財富；如果你臨近退休、想求個安心，政府年金就係一個唔錯嘅避風港。
🔍 投資者注意
免責聲明： 本人並非香港證監會持牌人，本視頻及文章所有分享純屬個人意見，絕對不能視為投資意見，亦不構成任何投資產品之要約、要約招攬或建議。另本人無法保證有關內容的真確性和完整性。所有投資產品（包括ETF）均涉及風險，價格可升可跌，甚至可能變成毫無價值。進行任何投資決定前，請務必自行做功課或諮詢你的專業投資顧問。
❓ 常見問題（FAQ）
問：如果我買咗政府年金，中途突然等錢使想退保，係咪一定蝕硬？
答： 係呀，呢個係政府年金最大嘅缺點。字幕入面都提到，如果你頭幾年退保，你只能拎返大概「66折」左右嘅錢（視乎年期）。簡單嚟講，頭段時間退保係極之唔划算，所以買之前一定要確定呢舊錢係「閒錢」，短期內唔會郁動。
問：點解買政府年金，女士每個月派嘅錢會少過男士？明明大家俾同樣嘅錢？
答： 因為根據統計處數據，香港女士嘅平均預期壽命係長過男士嘅。政府年金嘅設計係「對沖長壽風險」，即係預咗你拎得耐啲，所以將總額攤分落去每個月，自然就會少啲。放心，政府計數一定計過度過，唔會蝕底嘅。
問：如果備兌ETF咁高息，萬一股價跌到變晒廢紙咁點算？仲有冇息收？
答： 呢個就係投資產品最致命嘅風險！Covered Call ETF嘅派息係「不保證」嘅，而且派息金額通常同資產淨值掛鉤。如果股價跌到得返幾成，就算佢派10厘息，你都只係拎到好少錢。最壞情況係基金公司倒閉或者退市，雖然戶口有信託保障，但過程都會好煩瑣。所以一定要做足風險管理，唔好瞓身。
問：聽講買年金可以令到申請「長者生活津貼（長生津）」容易啲，點樣操作？
答： 無錯！社會福利署有個規例，就係投保年金嘅金額係可以豁免計算為「資產」。即係如果你有舊錢剛好超出長生津嘅資產上限，你可以將嗰舊錢轉去買年金，令到資產總值降低去符合門檻。不過要留意，每月派發嘅年金金額係會計入「每月入息」嘅，所以要計得準確，唔好過咗入息上限，否則就會失去資格。
參考資料︰
