前排個市上上落落，身邊好多朋友都發生「我一買就跌，一沽就升，點算好？」「我個倉入面有贏有輸，完全唔知邊隻要留邊隻要斬，有冇得搵個醫生睇吓？」如果你都有呢個煩惱，今次呢篇文你一定要睇到尾，因為老Best會同大家實測富途牛牛AI嘅專家模式，唔使裝Skills、唔使開戶（未開戶都問到三條），直接用手機App撳幾個掣，AI就幫你做齊持倉診斷、技術指標、資金流向，甚至比較幾隻ETF嘅管理費、派息、規模增長，仲出埋圖表同Table畀你參考。
牛牛AI專家模式點樣玩？
好簡單，打開富途牛牛手機App，喺右上角搵到「牛牛AI」嘅圖案，點一下就會進入AI功能，然後喺輸入欄位將模式切換做「專家」，就可以用喇。最正嘅地方係，唔使好似以前玩小龍蝦咁要自己裝Skills，佢會自動引用大量數據源，包括持倉資訊、日線數據、新聞、榜單等等，然後背後再用Agent幫你整合出圖表同文字報告。
至於免費次數，如果你係普通Level 1用戶，每個月可以問10次；Level 2有25次，如此類推。就算未開戶都送你3條問題，試完覺得好用先再考慮開戶都未遲。
案例一：持倉診斷 — AI醫生幫你睇症
今次老Best借咗朋友嘅真實持倉做示範（我自己就唔方便Show倉，費事大家當抄功課）。我問咗一句：「幫我診斷目前的持倉，還有告訴我有沒有什麼值得關注的美股交易機會」。
結果AI唔使一陣就出咗一份詳細報告，仲分咗幾個部分：
1. 極端分化格局 — 「強者恆強，弱者更弱」
AI用圖表清楚顯示邊啲持股賺錢（綠色）、邊啲蝕錢（紅色）。朋友個倉出現咗嚴重嘅強弱懸殊——有啲股票已經升到回本（回報率100%），但另一邊廂因為揸咗期權同槓桿產品，出現深度虧損，成個組合埋單跌咗23.6%（市值約40.7萬港元，浮動虧損9.6萬）。
2. 盈虧結構拆解
AI將所有持股分成三類：
- 盈利核心：貢獻最多利潤嘅股份
- 浮浮沉沉：暫時未見明確方向
- 深度虧損：主要係期權同槓桿產品，因為時間值消耗引致浮損
仲特別提示呢類產品高風險、波動性大，隨住時間過去會不斷蝕時間值，要小心。
3. 逐股深度診斷
AI會為每一隻持倉股，從技術層面、資金層面、基本層面、催化劑／分析師數據逐個維度俾評語，話你知邊隻強邊隻弱，非常仔細。
4. 美股交易機會參考
另外我順便問咗今個星期美股有咩機會，AI即刻引用新聞話CPI同PPI雙雙降溫，通脹壓力減低；加上摩根大通、高盛等五大行Q2業績強勁，金融板塊有向好跡象；同時半導體資金開始流向七巨頭，但AI敞口仍然保持。佢仲會提你月尾聯儲局議息，呢啲全部可以作為參考。
案例二：三隻備兌Call ETF（3416 / 2802 / 3519）深度比拼
第二個案例更加精彩，老Best問咗一條好長嘅問題，要求AI比較三隻備兌認購ETF——3416、2802同3519，仲要佢分析佢哋嘅規模、管理費、現金比例、資金流向，以及由7700點到8500點嘅股價預測（每100點跳動）。
老Best 提問方式︰「港股etf 3416， 2802， 3519 為國指備兌ETF，他們也在六月末進行賣出認漲期權為7,700點的轉倉操作，請就3隻ETF的基本牌面、規摸、持倉、現金、現價走勢、資金流出流入作出評價，另外作出分別在國指7,700點至8,500點之間，每100點股價變化作出預測。」
AI大約用咗5分鐘就出咗一份完整報告，仲有Table同圖表，效率高到嚇親人。以下係幾個重點發現：
1. 封頂真相 — 7700點已深度價內
三隻ETF都喺6月做咗轉倉操作，賣出7700點行使價嘅認購期權。但而家國指已經升到8136點 (2026年7月17日)，大幅高過行使價，即係Short Call處於深度價內，導致ETF上行動力嚴重封頂。AI好坦白咁話：「上行空間嚴重受限，每升100點，ETF股價只會郁0.01至0.02，Delta極低。」
2. 基本數據比對
AI用Table列出三隻ETF嘅管理費、派息頻率、52周高低、單位淨值等。佢評價：
- 3416：市場龍頭，上市最早、規模最大（由1月到而家已經173億）、管理費最低，派息紀錄完善（已派29次息），係最穩陣嘅選擇。
- 2802：規模居中，但管理費同開支比率偏高，而且現金比例異常高（冇放入貨幣基金），AI狠批呢個會拖累跟蹤表現同期權金收入。
- 3519：上市不足兩個月，規模唔夠1億，流動性嚴重不足，AI提示 入場需謹慎。
3. 資金流向
AI分析近十日資金流，3416錄得淨流出約6400萬，2802都流出2900多萬，反映資金因為封頂效應而陸續撤離。
4. 股價預測表＋圖表
AI跟住我嘅要求，由7700點到8500點每100點做一個預測股價，仲畫咗一條曲線圖，互動式顯示每個點位嘅價格。另外佢仲做咗敏感度分析，話如果國指跌穿7300點，Short Call嘅期權金收入只能提供200-400點嘅緩衝，即係大跌時期權金都保護唔到股價下跌嘅虧損。
AI嘅局限與參考價值
講咗咁多好嘢，都要講返現實——AI只係一個輔助工具。佢可以幫你極速篩選數據、做初步分析、出圖表，但你永遠要記住：
- 數據可能因為更新時間而有偏差（例如現金部分可能計咗去貨幣基金，未必直接反映）
- 技術指標同預測只係基於歷史數據，未來市況可以完全唔同
- 最終買賣決定、風險管理、注碼控制，全部都要靠你自己努力做功課
老Best自己都會fact check AI嘅答案，唔會盲目跟從。呢個工具最正嘅地方，係幫你節省大量做功課嘅時間，但絕對唔係幫你決定買定沽。
🔍 投資者注意事項
免責聲明： 本人並非香港證監會持牌人，本文章所有分享純屬個人意見，絕對不能視為投資意見，亦不構成任何投資產品之要約、要約招攬或建議。另本人無法保證有關內容的真確性和完整性。投資涉及風險，價格可升可跌，過往業績不代表將來表現。做任何投資決定前，請務必自行做功課，或諮詢你的專業投資顧問。
❓ 常見問題（FAQ）
問：我未開戶，用唔用到牛牛AI專家模式？
答：可以。就算未開戶，都有3次免費提問機會，試啱先再決定開戶都未遲。
問：每個月免費次數點計？分別有幾多次？
答：Level 1用戶每月10次，Level 2每月有25次，Level 3每月有100次等級愈高次數愈多。提問時記得切換做「專家模式」，先用到呢個進階功能。
問：AI嘅分析結果信得過嗎？點解佢會話3519「入場需謹慎」？
答：AI嘅數據主要嚟自富途平台嘅公開資訊、新聞同技術指標，佢嘅評價係基於規模、流動性、管理費等客觀數字。以3519為例，因為上市不足兩個月、規模不足1億、成交疏落，所以AI好直接咁提示風險。但記住，AI唔係100%準確，你仍然要自己核對數據，例如佢可能將貨幣基金當成現金，呢類細節要自己留意及多做功課。
問：專家模式同普通模式有咩分別？
答：普通模式傾向簡單問答，專家模式會自動調用多個技能（持倉、新聞、技術指標、榜單等），仲會生成圖表、表格同詳細分析報告，適合想做深入投資研究嘅用戶。
問：AI嘅股價預測準唔準？可以跟住嚟買賣嗎？
答：絕對唔可以！嗰啲預測只係基於期權定價模型同歷史波幅嘅理論計算，實際市況受好多因素影響（消息、政策、資金流向等）。你可以拎嚟做參考，但買賣決定一定要靠自己判斷，切記做好風險管理。
參考資料︰
