老Best 最近有唔少粉絲問我，點樣可以每個月「坐喺度收錢」？係咪買 Global X (3416/3417/3419) 或者 南方東英 2802 呢啲高息產品就搞掂？今次我特別將之前兩條片嘅精華，整理成呢份「Covered Call ETF 完全教學手冊」。如果你未認識Covered Call 是甚麼便跑去投資相關產品，可能會出現很多很模擬的風險情況，首先建議大家先看我第一條影片，當中由 2分37秒開始會慢慢手把手將整個Covered Call 的操作概念用通俗嘅方式同大家拆解。
一、 乜嘢係 Covered Call？（超簡單蘋果理論）
對新手嚟講，沽出備兌認購期權 (Covered Call) 聽落好專業，其實佢嘅原理好簡單，只需要兩樣嘢：
- 持有現貨資產： 例如你買入咗股票或者指數(期貨)。
- 賣出「認購期權」（Call Option）： 即係你賣一個「權利」畀人，畀對方喺未來某一日，可以用固定價格（行使價）同你買咗件貨。
點解要咁做？ 因為你賣出呢個權利，對方要畀返「期權金」你。呢份期權金就係大家收緊嘅「高息」來源，但當中最困難就係操作期權金的賣出及買入價，這樣就考操作的投資者或者基金經理的功力了。
二、 投資後會發生嘅 4 種情況（必睇！）
買入 Covered Call ETF 後，市場升跌會直接影響你嘅回報，以下是老Best綜合最常見的4種情況：
情況1︰
慢牛（微升）： 最正嘅情況！你既可以賺到股價上升嘅錢，又可以袋埋期權金，達成「財息兼收」。
情況2︰
大牛（暴升）： 雖然市升得好勁，但因為你已經應承咗用固定價賣畀人，所以升幅會被「封頂」，你賺唔晒所有升幅。關於這一部份最新老Best都出多一條影片，用實際發生的例子進行深度拆解，按此 學習該情況
情況3︰
橫行或微跌： 期權金可以發揮「緩衝」作用，幫你抵消部分甚至全部嘅股價跌幅，保障本金。
情況4︰
大熊（暴跌）： 雖然期權金可以幫你填補少少損失，但股價跌得太勁，你依然係會蝕錢，所以呢類產品唔係「保本」㗎。
三、 兩大熱門產品大比拼：2802 vs 3416
依家香港最熱門嘅兩隻產品係南方東英 2802 同 Global X 3416。雖然佢哋都係掛鉤國指做備兌Covered Call 策略，但細節大有不同：
- 派息率： 南方東英 2802 相對進取，目標年化息率約 17%（目標每月每股派 $0.13，結果首期派息為每股$0.14，當中有5大特色優勢，可以 按此 詳情了解）；而 Global X 3416 則約 每股派 $0.14， 年化息率15-16%。
- 規模與流動性： Global X 3416 係全港規模最大嘅同類 ETF，資金超過 172 億 (截止2026年1月20日，仍在不斷增長中)，流動性足夠，買賣極之容易。南方東英 2802 雖然規模增長好快（7 日激增 5 倍），但目前規模依然較細，流動性不足，所以老Best 都試過被割了 (如果想知老Best點解被割，可以 按此 睇返個流動性問題)。
- 操作風格： 南方東英 2802 嘅行權價設得較接近現價（Aggressive），市況好時期權金較多；Global X 3416 則相對保守，留返多少少空間在現金流中，方便操作期貨對沖。
四、 老 Best 實測：小心流動性陷阱！
新手最容易忽略嘅就係「流動性風險」，我亦都不例外(菜鳥T_T)，實測，想以 $8.9 賣出 南方東英 2802，結果因為規模細、買家唔夠，最終只係成交到 1,500 股，其餘賣唔出，眼白白睇住股價跌落去，仲要被拆單，比了2次平台交易費，可以 按此 睇返個次分享。
專家貼士： 規模大嘅 ETF（如 Global X 3416）通常幾分鐘就排到你買賣。如果你打算大額進場，流動性係你首先要考慮嘅因素。
五、 點樣部署退休或收息組合？
如果你有 100 萬，想用嚟供樓或者退休，係咪全部買晒 Covered Call ETF？千祈唔好！(非投資建議)
雖然 Global X 3416 或 南方東英 2802 嘅息率高過恆生銀行好多（約 15% vs 4.5%），但佢嘅派息係「不保證」嘅，甚至有機會喺你嘅本金(資本)入面扣，同埋有機會隨時減息，所以要常常做風險管理及分配。
建議方案：分散風險 (2233 或 334 分配法)，如果不太懂這個風險分配，可以看這一集內容中的第3部份，投資及風險例子 (按此)。
- 20% 現金/定期： 保障基本流動性。
- 20-30% 穩定產品： 如貨幣基金或短期債券。
- 30-50% 進取資產： 例如 3416 或 2802，用嚟博取高回報及額外被動收入。
總結：懶人投資心法
Covered Call ETF 最適合「磨吓磨吓」嘅橫行市，佢可以幫你將悶市變現金流。你唔需要自己辛苦去操作期權，交畀基金經理每月幫你「轉倉」就得。
但記住，高回報一定伴隨風險。買之前要多留意財經日曆（如美國 PMI、中國央行貸款利率），做好風險管理，先可以真正做到佛系收息！
如果你覺得呢篇文幫到你，記得 Share 畀想收息嘅朋友睇！有任何問題，歡迎喺下面留言一齊傾！
註：以上純屬個人觀點分享，不代表任何投資建議。投資有風險，記得做好風險評估及咨詢你的專業投資顧問。
About the Author
