3416 Global X 國指備兌認購期權 ETF 全面分析

最近唔少讀者問我，點樣可以增加被動收入，每個月「自制出糧」畀自己？見到網上有人話買 3416（Global X 國指備兌認購期權 ETF） 每月收成萬幾蚊息，到底呢隻嘢係咪真係咁正？係咪可以買完就「佛系退休」？

今日我將之前影片嘅精華整理成呢篇文字版，用簡單嘅方式同大家拆解呢隻「收息神器」！

對新手嚟講，3416 嘅全名好長，其實佢嘅核心原理叫 Covered Call（備兌認購期權）。你可以咁樣理解：

持有現貨： 3416 幫你買入國企指數（國指）嘅成分股（例如阿里巴巴、騰訊、建設銀行等）。
賣出「認購權」： 基金經理會代表你賣出一份合約，應承人哋喺未來某個日子，可以用一個固定價錢（行使價，3416 通常設喺 9200 點附近）同你買咗手上啲貨。
賺取期權金： 因為你畀咗呢個權利人哋，對方就要先畀一筆「期權金」（好似訂金咁）你。呢筆錢就係大家每個月收到高息嘅主要來源。

簡單總結： 3416 係透過持有國指成分股，再賣出「買入權」嚟賺取期權金，從而製造每個月穩定嘅現金流。

好多人被 3416 吸引，係因為佢嘅息率真係好誇張。

簡單總結： 3416 憑藉高達 16% 嘅回報率，提供咗遠超傳統收息股嘅被動收入，非常適合追求每月現金流嘅投資者。

買入呢類產品，個市點行會直接影響你嘅回報，但要關注係基金經理每月轉倉及開倉時，期權金的收益會直接影響派息：

大牛市（賺唔晒）： 如果國指爆升穿咗 9200 點，你就要按合約用 9200 點賣走啲貨。雖然你有期權金同埋股價升幅，但升幅會被「封頂」，人哋賺 20%，你可能只係賺得 5%。

微跌市（有緩衝）： 期權金可以幫你抵消部分股價跌幅。例如股價跌咗 5%，但你收咗 2% 息，實質只係蝕 3%。

大熊市（一樣蝕）： 如果股市暴跌 25%，期權金只能幫你墊底 5%，你最終仲係要蝕 20%。所以呢隻嘢唔係保本㗎！

簡單總結： 3416 最適合橫行市，但在大升市會限制回報，大跌市則無法完全避開本金損失。

最近多咗隻新產品 2802 南方東英國指備兌認購期權主動型 ETF。雖然 2802 入場費平（約 $880 一手），息率可能更高（目標 17%），但點解依然 3416都是受大眾歡迎，未有特別大的影響？

規模大： 3416 係全港首隻且規模最大嘅同類 ETF，資金超過 16X 億(截止2026年1月24日)。
流動性好： 因為規模大，你想買或者想賣嘅時候，幾分鐘內就可以成交。老 Best 實測過細規模嘅 ETF（如 2802 初期），試過想賣但「賣唔出」，呢個就係流動性陷阱。

簡單總結： 3416 勝在規模大、買賣容易，對於資金較多或注重隨時「上下車」嘅投資者嚟講，流動性保障更強。相比新力軍2802來說，在港股市場歷史較久，過往派息表現一致維持，有一定品牌信心及口碑。而2802有咩特色可以威脅到3416 大哥的地位，可以睇睇老Best另一個文章分享。

雖然 16 厘年息好吸引，但新手千萬唔好盲目衝入去：

分散投資： 千萬唔好將所有退休金（例如 100 萬）全部買晒 3416。建議用 2233 或 334 分配法，只將一部分（例如 30%）放落呢啲高息進取資產，其餘放喺現金、定期或債券。
留意財經日曆： 多啲留意美國議息、中國央行貸款利率等數據，因為呢啲會直接影響國指表現。亦要小心Call Option 封頂的情況。
要有坐艇準備： 派息係不保證嘅，甚至有機會喺你嘅本金(資本)入面扣錢嚟派息。